*Lögreglufélag Suðurnesja, skammstafað L.S. var stofnað á félagsfundi, sem 19 lögregluþjónar starfandi á  Keflavíkurflugvelli og í Keflavík efndu til, þann 19. desember 1949.

*Fundur þessi var all sögulegur, því m.a. þurfti að bera fram tillögu um að fjarlægja með valdi, gerðist þess  þörf, einn fundarmanna. Þannig að það er ekkert nýtt að það gusti um lögreglumenn á fundum.

*Fundarstaður var herbraggi sem lögreglan á flugvellinum hafði til umráða og var skammt ofan við Iðavelli í  Keflavík, um miðja vegu á milli Húsasmiðjunnar og Reykjanesbrautarinnar.

*Í fyrstu stjórn félagsins voru kjörnir eftirtaldir :

*Sigtryggur Árnason formaður, lögreglunni í Keflavík.
*Þórarinn Fjeldsted ritari, frá flugvellinum.
*Benedikt Þórarinsson gjaldkeri, frá flugvellinum.

*Höfundur að nafni félagsins er Bjarni J. Gíslason, frá flugvellinum.

*L.S. var eina starfandi félag lögreglumanna á Suðurnesjum, uns lögreglumenn starfandi í Keflavík og  annarstaðar á Suðurnesjum gengu úr því 25.nóv.1958 og gengu í félag bæjarstarfsmanna í Keflavík.

*Árið 1974, nánar tiltekið 20. jan., sameinaðist lögreglufélagið aftur með því að þeir sem úr því gengu 1958 gengu aftur í L.S.

*Sú skipan mála hélst um hríð eða þangað til Lögreglufélag Gullbringusýslu var stofnað þann 29.mars.1982  og lögregluþjónar annarsstaðar en á Keflavíkurflugvelli gengu úr L.S.og í hið nýja félag. Skipting þessi fór  fram í bróðerni en togstreita hafði verið um hríð milli hópanna, þar sem flugvallarmennirnir voru ávallt í  meirihluta og höfðu verið deilur milli aðila um uppbyggingu á félagsaðstöðu við lögreglustöðina á  Keflavíkurflugvelli,en hluti þeirra sem voru ekki starfandi þar höfðu meiri áhuga á að byggja upp á sínu  svæði. Þetta og reyndar fleiri gömul mál, eins og t.d.Sigtryggsmálið og fleiri mál voru í reynd rótin að því  að betra þótti að skipta félaginu.

*Í reynd hefur þó ávallt ríkt gott samstarf og samvinna á milli liðanna og síst meiri deilur þeirra á milli en gerist á milli manna á hverju svæði fyrir sig.

*Varnarsvæðið; almenn löggæsla og sameiginlegt samstarf við herlögregluna um eftirlit á svæðinu og  gæsla í varðskýlum við innkomu/útleið af svæðinu.
*Flugstöð Leifs Eiríkssonar, vegabréfadeild, vopnaleit, þar er unnið í samstarfi við tollgæsluna sem einnig  heyrir undir sýslumannsembætttið á Keflavíkurflugvelli.
*Fangafylgd er einnig hluti af okkar starfi og hafa menn orðið að fara til flestra evrópulanda, Mexikó og  USA.
*Flugbrautarsvæðið allt, ásamt almennri löggæslu þar.
*Þá er jafnframt starfssamningur um eftirlit með Reykjanesbrautinni og samstarf við lögregluna í umdæmi  Gullbringusýslu um samstarf á helgum.

*Hin eiginlega lögreglustöð er nú í bráðabirgðahúsnæði suður af Flugstöð Leifs Eiríksonar. *Sýslumannsskrifstofan og aðstaða sumra úr yfirstjórninni er hinsvegar í gömlu lögreglustöðinni í Grænási,  sem nú er utan við girðingu varnarstöðvarinnar.